Bjelopoljski vatrogasci intervenisali na 25 lokacija

Služba zaštite i spašavanja Bijelo Polje u proteklih 48 sati imala je pune ruke posla i 25 intervencija na gotovo isto toliko lokacija gdje su gasili šumske požare, kaže za RTCG komandir te službe Edin Kolić.

“Čeoče, Čokrlije, Pape, Mrdavac, Laholo, Sajkovac, Brčve, Zaljevo, Zekica rijeka, Majstorovina, Granšarevo, Kamine, Surevice, Lećevišta, Šćepanica, Raljevci, Rakita, Crnča, Raklja, Pećarska, Dubovo, Metanjac, Godijevo. U jednom momentu gorjelo je na sve strane, a angažovani su bili svi pripadnici i sva raspoloživa specijalna vozila”, navodi Kolić.

Pored šumskih požara, vatrogasci su imali i jednu intervenciju na objektu gdje je gorio dimnjak.

“Gašenje nam je otežavao nepristupačan teren pa je trenutno aktivan požar na Kaminama, Godijevo, Laholo, Dubovo i Metanjac. Ekipe su na terenu na tim lokacijama i što je najbitnije ništa nije ugroženo. Uspjeli smo poslati i jedno specijalno vozilo i dva vatrogasca na ispomoć u Mojkovac, jer je bio ugrožen veliki broj kuća i pomoćnih objekata na više lokacija kao i Prošćenske planine”, navodi Kolić.