Zbog propusta nakon masakra u Skadru: Uhapšena četiri policajca, misterija treće osobe nije rasvijetljena

Nakon što su prošlog mjeseca u tamošnjem naselju Dobrač ubijene četiri osobe, u Skadru su juče uhapšena četvorica policajaca.

Podsjetimo, u tom gradu su 30. oktobra u pucnjavi iz automobila ubijene dvije osobe koje su bile u drugom vozilu, koje se potom sudarilo sa motorom – na njemu je bio bračni par i oboje su takođe stradali. Pritom, dvije osobe ubijene su na licu mjesta, a dvije su sljedećih dana podlegle povredama u bolnici.

No, kako se ispostavilo, u autu u kojem su bili stradali Hamza Ljići i Arljind Bušati bila je još jedna osoba koja je, nakon pucnjave, uspjela da pobjegne sa lica mjesta.

Naime, pregled snimaka sa okolnih kamera otkrio je kako je treća osoba pobjegla iz kola, pri čemu je do ovog dana ostala misterija o kome je riječ.

Nakon pregleda svih materijala, četvorica policajaca koji su bili na mjestu masakra lišena su slobode. Oni se terete da nijesu obavljali dužnost savjesno, te da je usljed tog propusta treća osoba uspjela da pobjegne.